لەبەرزایی ئیمانەوە بڕوانە جاهیلییەتی هاوچەرخ لەو كاتەی هەوڵەكانی لە خشتەبردنت لە لایەن جاهیلییەتی هاوچەرخەوە چڕتر دەبنەوە، كاتێك ڕۆژهەڵات و ڕۆژئاوا هەموو ڕێگاكانی گومڕایی و داماڵینت لەشەرم و شكۆ و باڵاپۆشی بۆ ئاسان و فەراهەم دەكەن و كۆشش دەكەن لە باوەشی پڕ میهرەبانی ئیسلام دەرتبهێنن و بۆ تێركردنی ئارەزووەكانیان بەكارت بهێنن و فیترەتت بشێوێنن. لەو كاتەدا لەبەرزایی ئیمانتەوە بنواڕە بۆیان و بەزەییت بە حاڵیاندا بیتەوە و شانازی بە وابەستە بوونت بە ئیسلامەوە بكە و دڵخۆشبە بەوەی الله تعالی لە زەلكاوی ئەو جاهیلەتە تۆی پاراستووە و نەبویتە بە كاڵایەك وەكو هەركاڵایەكی تر كڕین و فرۆشتنت پێوە بكرێت. ئافرەت لە دەرەوەی ئیسلام و دوور لە ڕێنمایی و حوكمەكانی قورئان و سوننەتە مەزنەكەی، هەموو ڕۆژێكی دووركەوتنەوەیە لە فیترەتی پاك و پاراو ڕۆچوونە لە بێ ڕیزبوون و لەكەداربوونی كەسایەتی وكەرامەتی، بەڵام لە ئیسلامدا بە ڕێزەوە لە دایك دەبێت و بە شكۆ و پاراوی دەژێت و بەسەربەرزی دەمرێت و بە ڕووسووری زیندوو دەبێتەوە...بە مەرجێك بە ڕواڵەت و لە ناخەوە خۆی بە عەقیدەی تەوحید تۆكمە و دامەزراو بكات و بەكاركردن بە شەریعەتە جوانەكەی خۆی برازێنێتەوە.