240502074833.jpg)
دیارده‌ی پانتۆڵی دڕاو هه‌نگاوێكی تر به‌ره‌و داڕمانی ڕه‌وشت یه‌كیك له نامۆترین ئه‌و دیاردانه‌ی له‌م دواییه له ناو گه‌نجی كورددا بڵاوبوویه‌وه كه چه‌ندین ئاماژه و واتای خراپ له خۆ ده‌گرێت، دیارده‌ی له‌به‌ركردنی پانتۆڵ و پۆشاكی دڕاوو داڕزاو و پینه كراوه، له ڕاستیدا ئه‌م پرسه شایانی راوه‌ستان و بایه‌خ پێدانه، چونكه دیارده‌كه بریتییه له هه‌نگاوێكی تر له داڕوخانی ناخی گه‌نجی كورد و دووركه‌وتنه‌ی له به‌ها و ڕه‌وشته به‌رزه‌كانی دینه‌كه‌ی وجۆرێكیشه له توانه‌وه له به‌هاو بیرۆكه نامۆكان كه ئایین و ڕه‌وشتی ئێمه‌یان كردووه‌ته ئامانج. له ڕاستیدا له كاتی وردبوونه‌وه له‌م دیارده‌یه زۆر حه‌قیقه‌تی تاڵمان بۆ ده‌رده‌كه‌وێت و خۆیشی باسه‌كه زۆر هه‌ڵده‌گرێت له‌سه‌ری بوترێت، به‌ڵام من لێره‌دا ته‌نها چه‌ند ئاماژه‌یه‌كی خێرا له سه‌ر ئه‌و مه‌سه‌له‌یه تۆمار ده‌كه‌م. - له‌به‌ر كردنی پۆشاكی دڕاو و پینه‌كراو ئه‌وه‌مان بۆ ده‌سه‌لمێنیت كه ڕاگه‌یانده‌كان به ته‌واوه‌تی زاڵ بوونه‌ته سه‌ر مێشك و بیركردنه‌وه‌ی خه‌ڵكیدا و چۆنیان بوێت به‌و شێوه ئاراسته‌یان ده‌كه‌ن و به‌ره‌و چی هه‌ڵدێرێك بیانه‌وێت ده‌یانبه‌ن و ئه‌وانیش وه‌كو مردوون له‌به‌ر ده‌ستی مردوو شۆردا. - هه‌روه‌ها لێدوان ده‌دات له عه‌قڵی به‌تاڵ و لاوازیی بیركردنه‌وه و نه‌بوونی هیچ مه‌ناعه‌یه‌ك له لای گه‌نجی كورد ، كه ئاماده‌یه به كارێك هه‌ڵسێت به هیچ شێوه‌یه‌ك نه له‌گه‌ڵ عه‌قڵ و نه له گه‌ڵ شه‌رعدا یه‌ك ناگرێته‌وه و نیشانه‌ی تێكچوونێكی ناله‌باره له میزاجی ئه‌و جۆره كه‌سانه و زه‌نگێكی ترسناكیشه كه له داهاتوودا ده‌بێت ئاستی به‌ره‌و هه‌ڵدێر چوونی ئه‌و گه‌نجانه به كوێ بگات! - له‌به‌ر كردنی پانتۆڵ و پۆشاكی دڕاو داڕزاو له لایه‌ن ئه‌و گه‌نجانه‌وه به شێوه‌یه‌ك كه به‌شێك له جه‌سته‌یان ده‌رده‌خات، ئه‌گه‌رچی له ڕووی مه‌نتیقییه‌وه كارێكی ناپه‌سه‌ند و ناشیرینه، له ڕووی شه‌رعیشه‌وه جێبه‌جێكردنه بۆ ئه‌جیندایه‌كی ده‌ره‌كی نامۆ كه ئامانجی سه‌ره‌كی ده‌رخستنی جه‌سته‌ی كچانه بۆ كوڕان و هه‌وڵێكه بۆ نه‌هیشتنی شكۆ و شه‌رمی كچان و دڕاندنی شه‌رم و شكۆی گه‌نجان له ڕێگه‌ی ئه‌و جله دڕاوانه‌وه بۆ ئه‌وه‌ی بگه‌نه كاروانی دووركه‌وتنه‌وه له به‌ها مرۆییه‌كان هاوشێوه‌ی ئافره‌تان له ئه‌وروپا. - ئینجا هۆكاری له‌به‌ر كردنی پۆشاكی دڕاو و پینه‌كراو ڕه‌نگه پێش هه‌موو شتێك لاساییكردنه‌وه‌یه‌كی كوێرانه بێت وه‌كو ئه‌وه‌ی له بواره‌كانی تری ژیانیشدا ڕوویداوه، به‌ڵام بێگومان كۆمه‌ڵێك پاڵنه‌رو هۆكاری تریشی له پشته‌وه ده‌وه‌ستێت، له‌وانه: * دووركه‌وتنه‌وه‌ی گه‌نجی كورد له ڕێنماییه‌كانی دینه‌كه‌یان و گوێ نه‌دانیان به ئه‌نجامدانی كاری حه‌رام و به‌ڵكو پاره‌ی زۆریش خه‌رج ده‌كه‌ن له پێناو ئه‌نجام دانی ئه‌و حه‌رامه . * هه‌روه‌ها ئاماژه‌ی تێدایه بۆ جۆرێك له ناڕه‌زایی ئه‌وان له باری گوزه‌رانی خۆیان و هه‌ڵگه‌ڕانه‌وه‌یان له زۆرێك له بابه‌ته جێگیره‌كانی كۆمه‌ڵگای خۆیان. * كاره‌كه‌شیان به‌ڵگه‌یه‌كی حاشا هه‌ڵنه‌گره له‌سه‌ر نامۆ بوونی ئایینی ئیسلام له ناو كورد به شێوه‌یه‌كی گشتی و له ناو توێژی گه‌نجاندا به شێوه‌یه‌كی تایبه‌ت، چونكه پۆشینی ئه‌و جۆره جل و به‌رگه دڕاو ناشیرین و نامۆیه، سه‌رپێچییه‌كی ڕوون و ئاشكرایه بۆ شه‌رعی ئیسلام و ئه‌و كاره به‌بێ هیچ سڵمینه‌وه‌یه‌ك له به‌زاندنی سنووری الله ئه‌نجام ده‌درێت. - ئه‌و گه‌نجانه - وه‌كو وتم - به‌و كاره‌یان جۆرێك له ڕه‌تكردنه‌وه بۆ كۆمه‌ڵگای كوردی نیشان ده‌ده‌ن و هه‌وڵ ده‌ده‌ن به‌و جله دڕاوانه‌ی ده‌یپۆشن كه جاران مه‌گه‌ر سواڵكه‌ره‌كان بیانپۆشیایه، بڵێن ئێمه هیچ هیوایه‌كمان نه‌ماوه‌و كۆمه‌ڵگاو خێزان و دامه‌زراوه‌ی كۆمه‌ڵایه‌تی كوردی سه‌ر له‌به‌ر ڕه‌تده‌كه‌ینه‌وه‌و ئاوات ده‌خوازین به گه‌یشتن به كاروانی بێگانه‌كان و نه‌یارانی دین و میلله‌ته‌كه‌مان. - ده‌شكرێت ئه‌وه‌ی لێ هه‌ڵێنجرێت كه ئه‌و گه‌نجانه جێگای به‌زه‌یین و تووشی سه‌رگه‌ردانی و بێ به‌رنامه‌یی و هه‌ستكردن به به‌تاڵی و وشكانی ناخ و ده‌روون بوونه وده‌سه‌ڵات و كۆمه‌ڵگایش له جیاتی ئه‌وه‌ی ده‌ستی یارمه‌تییان بۆ درێژ بكات به‌بێ ده‌نگی و ڕازیبوونیان له‌سه‌ر ئه‌و كاره نامۆیه‌ی ڕۆڵه‌كانیان ئه‌وانیش بوونه‌ته هانده‌رێك بۆ به‌ره‌و هه‌ڵدێر ڕه‌وانه كردنیان. له كۆتاییشدا ده‌ڵێم: زۆر جێگای سه‌رسوڕمان و نیگه‌رانییه كه باوكان و سه‌رپه‌رشتیاران به شێوه‌یه‌كی گشتی هه‌ستی به‌رپرسیارێتی و لێپرسینه‌وه‌یان له ڕه‌فتاری مناڵه‌كانیان به‌و شیوه تووشی لاوازی و پووكانه‌وه بوووبێت و وه‌كو ئه‌وه‌ی ئه‌و كوڕو كچانه‌یان ئه‌ركێكی پیرۆز و بارێكی قورس نه‌بن به‌سه‌ر شانیانه‌وه له ڕووی ئایینیه‌وه كه له‌سه‌ریانه له ده‌ریای نه‌فامی ئه‌م ڕۆژگاره ڕزگاریان بكه‌ن و بیانگه‌ینن به وشكانی سه‌لامه‌تی و ئارامی كه له ڕاستیدا ئه‌و ئامانجه‌ش ته‌نها به شوێنكه‌وتنی ڕێنماییه كانی ئیسلام وه‌دی ده‌كرێت وه‌كو ڕێبازێكی عه‌قیده و شه‌ریعه‌ت و ئاكار و ڕه‌وشتی به‌رز و جوان، كه دواجار ده‌بێته مه‌شخه‌ڵێك بۆ ڕوونكردنه‌وه‌ی ڕیگای دونیا و دوا ڕۆژیان. لێره‌شه‌وه داوا له مامۆستایانی ئایینی و مامۆستایانی قوتابخانه‌و زانكۆكان ده‌كه‌م كه تیشك بخه‌نه سه‌ر نامۆ بوونی ئه‌و دیاره‌یه و له ڕووی شه‌رعی و كۆمه‌ڵایه‌تی و كه‌سێتییه‌وه زیانه‌كانی ئه‌و دیارده‌یه روون بكه‌نه‌وه. هه‌روه‌ها داوا له‌و گه‌نجانه ده‌كه‌م كه كه‌سایه‌تی و دڵ و ده‌روون و میزاجیان تووشی تێكچوون نه‌بووه خۆیان له پۆشینی ئه‌و جۆره جل و به‌رگانه به دوور بگرن و ڕێگه نه‌ده‌ن شه‌پۆلی جاهیلیه‌ت رايانماڵێت، چونكه بێگومان وه‌كو شه‌رع پۆشینی ئه‌و جلانه حه‌رامه چونكه له لایه‌كه‌وه لاسایی كردنه‌وه‌ی بێ باوه‌ڕانه و له‌لایه‌كی تریشه‌وه ده‌رخستنه بۆ جه‌سته‌ی ئافره‌تان و كچان و موخه‌نه‌ت ده‌ركه‌وتنی گه‌نجانه، وه‌كو عورف و داب و نه‌ریتیش به هه‌مان شێوه كارێكی زۆر ناشیرین و ناپه‌سه‌نده. داواكارم له الله تعالی ڕێنوێنی گه‌نجه‌كانمان بكات بۆ په‌یڕه‌و كردنی ئیسلام چونكه ڕێگای سه‌رفرازی دونیاو دواڕۆژیانی تێدایه. إحسان برهان الدین 22 رمضان 1439 2018-6-8
