گومان لە گەورەیی دە ڕۆژی سەرەتای مانگی (ذي الججة)دا نییە، عیبادەتیش تێیدا لە عیبادەتی هەموو كاتێكی تر لەلای پەروەردگار خۆشەویسترە، هەموان جەخت لەسەر ئەو مەسەلە دەكەنەوەو ڕاستیش دەكەن، بەڵام ئەم قسە نوقسانی و كەلێنێكی گەورەی تێدایە بە دەگمەن باس دەكرێت ئەویش ئەوەیە:

عیبادەت لەم دە رۆژەدا و لە رەمەزان و شەوانی قەدر و لە وەرزی حەج و عومرە و هەر كات و شوێنێكی تردا، بەستراوەتەوە بە ڕاست و درووستی عەقیدەی خاوەنەكەی، بۆ نموونە ئیسلام وەكو تەلارێكی گەورەیە، عەقیدە وتەوحید بنچینەی ئەو تەلارەیە، عیبادەتیش ئەو بونیاتەیە كە لەسەر بنچینە تۆكمەكە درووست كراوە.

ئەو پاداشتانەی لە كیتاب و سونەتدا بۆ خاوەن عیبادەتەكان باس كروان هەمووی دەبێتە نسیبی ئەو كەسەی كە لەگەڵ كردەوەی چاكە و عیبادەتەكەیدا تەوحیدێكی ڕاست و درووست و تەواوی هەبێت، بەبێ هەبوونی ئەو عەقیدەیە كردەوەكان هیچ سوودێكیان نییە،

خاوەن عیبادەت سوود لە عیبادەتی خۆی نابینێت بنچینەو بنەماكانی عەقیدە لە خۆیدا بەرجەستە نەكات، بۆ نموونە:

ولاء و براء و مەرجەكانی شایەتمانی لە خۆیدا جێبەجێ كردبێت و خۆی لە هەڵوەشێنرەوەكانی پاراستبێت وسەد لەسەد ڕازی بێت بە حوكمی شەریعەت وفەزڵی هیچ یاسا و ڕێسایەكی تری ڕۆژهەڵات و ڕۆژئاوا بەسەر حوكمی شەریعەتی ئیسلامدا نەدات و ڕازیبوونی خۆی بە زاهیر و لە ناخیشەوە بە هەموو ئەوەی الله و پێغەمبەرەكەی صلی الله علیه و سلم حوكمیان لەسەری داوە نیشان بدات بە زمانی حاڵ و كردار و گوفتار لەوە بەری بێت كە هیچ حوكمێكی ئیسلام بۆ ئەم سەردەمە نەشیاو بێت و وعیبادەتی هەموو مەعبودێكی تر جگە لە الله تعالی بەهەر شێوەیەك لە شێوەكانی عیبادەت ڕەت بكاتەوە و هەموو پاڕانەوەو گوێڕایەڵی و متمانەیەكی تەنها بە الله و بەبەرنامەكەی بێت و بە رێگای سەرفرازی دونیا ودوا ڕۆژی بزانێت.

بە پێچەوانەشەوە كەسێك لەمەسەلەی عەقیدەدا تێكەوتبێت و بەرنامە دەستكردەكانی مرۆڤەكانی پێ قبوڵ بێت و ئیسلام بە ڕەهایی بەتاكە بەرنامەی شیاو بۆ ژیان نەزانێت و وەلائوبەرائی ناتەواو بێت و حوكم و فەرمان بۆ غەیری الله بگەرێنێتەوە یان بڵێت ئیسلام سەرچاوەیەكە لەگەڵ چەندین سەرچاوەی تر بۆ حوكم و تەشریع، ئەو كەسە ئەگەر سەدەیەك تەمەن بكات و هەموو ڕۆژەكانی بە ڕۆژو بێت و شەوەكانیشی بەشەو نوێژ بەسەر ببات وبە ئەندازەی كێوەكان زێڕ لە پێناو الله ببەخشێت سوود لەو عیبادەت وسەدەقە و بەخشینانەی وەرناگرێت.

مامۆستایانی ئایینی و زۆربەی زۆری بانگخوازەكان سورن لەسەر ئەوەی عیبادەت لەعەقیدە جیا بكەنەوە، مەبەستیانە ئیسلام وەكو دینێك نیشان بدەن تەنها داوای عیبادەتی لە موسوڵمانان كردووە و ئەگەر عیبادەتیان ئەنجامدا بەبێ هیچ كێشەیەك ئەچنە بەهەشتەوە، لە كاتێكدا قورئان هەرگیز واناڵێت، سوننەتیش لەگەڵ ئەم بیرۆكە نامۆیەدا دژوارە!

قورئانی پیرۆز لە سوڕەتی الفاتحة تاكو سوڕەتی الناس، سوننەتیش بەهەمان شێوە، بەردەوام جەخت لەسەر گرنگی عەقیدە دەكەنەوە و بەڕاشكاوی دەڵێن عیبادەت بەبێ ئەوەی لەسەر عەقیدەیەكی ڕاست و درووست بونیات نرابێت هیچ بایەخێكی نییە و(هباء منثورا) بەزایە دەڕوات