ماڵپەڕی فەرمی مامۆستا احسان برھان الدین
هەر كێ ڕێگەی بە هەڵبژاردن داوە.. نەیپێكاوە!
الله تعالی لە قورئانی پیرۆزدا فەرموویەتی: ﴿اتَّبِعُوا مَا أُنْزِلَ إِلَيْكُمْ مِنْ رَبِّكُمْ وَلا تَتَّبِعُوا مِنْ دُونِهِ أَوْلِيَاءَ قَلِيلا مَا تَذَكَّرُونَ﴾هەروەها فەرموویەتی: ﴿وَلا تَقْفُ مَا لَيْسَ لَكَ بِهِ عِلْمٌ ﴾ هەروەها پثشەوا مالك بن أنس و زانای تریش فەرموویانە: (كل يؤخذ من كلامه ويترك إلا صاحب هذا القبر) لە ڕاستیدا ئێمە دین لە قورئان و فەرموودە وەردەگرین و قسەی زانایانیش لە ڕۆشنایی ئەو دوو سەرچاوەدا وەردەگرین. موسوڵمانی تێگەیشتوو لە دینەكەی، تەنها شوێنكەوتووی كیتاب و سوننەت دەبێت و بە فەتوا و ڕاو بۆچوون و تێگەیشتنی كەس دینداری ناكات ئەگەر بەڵگەی لەو دوو سەرچاوە پێ نەبێت و لەبەر هەر هۆكارێك بێت و پێچەوانەیان قسە بكات ئەگەرچی شێخ عبدالعزیز بن باز و شێخ محمد صالح العثیمین دواجار مرۆڤن و مەعسوم نین و هەڵەیان لێ دەوەشێتەوە، بەڵام بۆ ئەوانەی كە دڵ بە فەتوای ئەوان لە ڕێگەدان بە بەشداریكردن لە هەڵبژاردن خۆش دەكەن ئەم چەند خاڵەیان پێشكەش دەكەم، بۆیەش باسی شیخ ناصرالدین الألباني ناكەم لەبەر ئەوەی پاش ئەوەی وەكو خۆی دەڵێت لە بابی أخف الضررین ەوە فەتوای بۆ جەزائرییەكان دا كە درووستە بەشداری هەلبژاردن بكەن، دواتر دوای ئەوەی شیخ مقبل هادء الوادعي و هەندێ زانای وڵاتی یەمەن نامەیان بۆ نووسی لەو بارەوە وتی من ئەو كاتەش هەر لەبابی ناچارییەوە ڕیگەم داوە!
ئینجا بەتەواوی پاشگەزبوونی خۆی ڕاگەیاند لە وەڵامی شێخ مقبل و زاناكاندا، وەكو سلیم الهلالي لە شریتی (أسئلة الطالب اليماني لطلبة الألباني) باسی دەكات
1- هەڵوێستی ئەو دوو زانایە لە دەسەڵاتی سعودیە هەمیشە دیار بووە كە تاكو مردنیان لە هیچ مەسەلەیەكدا ڕەخنەیان لێ نەگرتوون و ڕۆژێك لە ڕۆژان فەتوایەكیان نەبووە لە بوارەكانی سیاسەتی دەرەوەو بواری سەربازی و ئەمنی و هەر بوارێكی تر كە بە دڵی ئەوان نەبێت، یان دژی ئاراستەی ئەو دەوڵە بێت ، بۆ مەسەلەی هەڵبژاردنیش بە هەمان شێوە نەیانتوانیوە ئەو كارە بكەن لەبەر ئەوەی فەتوایەكی لەو جۆرە لێدان بوو لە سیاسەتی ئەو دەوڵەتە كە ئەو زانایانە ئەوانیان بە وەلی ئەمر زانیوە و ڕێگەیان بە خۆیان نەداوە لە هیچ شتێكدا سەرپێچییان بكەن كە ئەوەش هەڵەیە بێگومان بەڵام ئیتر ئەوە خۆیان و پەروەردگاریان چۆن وەڵامی ئەوە دەدەنەوە، لەلایەكی تریشەوە ئەوان لە سعودیە پەرلەمان بە شورا ناو دەبەن و بە زەقی و بە ئاشكرا كەس ناتوانێت دەقێكی قورئان رەت بكاتەوە و كۆمەڵێك جیاوازییان لەگەڵ غەیری خۆیاندا هەیە، هیچ نەبێت ئەوەندەی كە ئەو زانایانە بەهانەیەكیان بەدەستەوە بێت دژایەتی نەكەن، وەكو بڕینی دەستی دز و ڕەجمی زانی محصن و ڕێگەنەدان بە سووكایەتی كردن بە ئیسلام پێش ئەوەی لەسەردەمی محمد بن سلمان زۆرێك لەو شتانە گۆرانكاری گەورەیان بەسەردا بێت و سعودیە بە شێوەیەكی ترسناك و خێرا بەرەو عەلمانیەت هەنگاو بنێت!
2 – ئەو دوو زانایە بەتایبەتی ابن عثیمین، چەندین فەتوای تریان هەیە وەكو جۆرێكە لە هەڵوەشاندنەوە بۆ فەتوای ڕێگەدان بە بەشداری كردن لە دەنگداندا، بۆ نموونە ئەوان درووستكردنی حیزبی سیاسی بە حەرام دەزانن جا وەرە لەم دوو مەسەلە دژوارە تێبگە كە شێخ مقبل یش هەمان ئەم سەرسوڕمانەی بەرانبەریان نییشاندا چۆن لەلایەكەوە پێكهێنانی حیزبی سیاسی بە حەرام ئەزانیت و لەولاشەوە بەشداری كردنی حیزبی سیاسی لە پەرلەماندا بە شەرعی دەزانیت!
3- ئینجا ئەگەر پرۆسەی هەڵبژاردن بە تێكڕایی باس نەكرێت، بەڵكو بەش بەش بكرایەتەوە و پێكهاتە نادیارەكانی پرسیارەكە بخرایەتە ڕوو و بەو شێوە پرسیار لەو دوو زانا بكرایە، بۆ نموونە بوترایە حوكمی بەشداریكردن لە دەنگدان و خۆ كاندید كردن بۆ پەرلەمانێك چییە كە لە جیاتی الله پاشان پێغەمبەرەكەی شەرع دادەنێن و دەسەڵاتیشیان هەیە هەر حوكمێكی كیتاب و سوننەت لابدەن و بیگۆڕن، جا بزانە لەو كاتەدا ئەوان وەڵامیان چی دەبوو؟!
لە ڕاستیدا ئەگەر پرسیارەكە بە ڕوونی و بەش بەش بكرایە لەو دوو زانایە بۆ هەموو بەشێكی پرسیارەكە فەتوای حەرامی و بەڵكو لە حەرامیش توندتر لە فەتواكانی ابن باز و ابن عثیمین دا دەبینرا و دەبیسترا، بۆ نمونە پرسیاریان لێ بكرایە:
- حوكمی دیموكراسی كە كۆڵەكە و بنەمای هەڵبژاردنە چییە؟
- حوكمی یەكسان كردنی پیاووژن لە هەمو شتیكدا و یەكسانی دەنگی موسوڵمان و نا موسوڵمان چییە؟
- حوكمی تەشریعدانان و یاسادانانی دژ بە شەرعی ئیسلام و ڕوونكردنەوەی ئەوەی كە ئەندام پەرلەمانەكان ڕۆڵی شەرعدانەر و ئەرباب دەبینن لە پەرلەماندا.
- پرسیاری ئەوەیان لێ بكرایە ئایا حوكمی لابردنی حوكمەكانی قورئان و سوننەت و گۆڕینیان بە حوكمی هاوچەرخی درووستكراوی مرۆڤەكان چییە؟.
- ئایا سوێندخواردن لەسەر جێبەجێكردن و ڕێزگرتن لە دستورێك كە تا لە مەسەلەیەكدا بە حوكمی ئیسلام ڕازی دەبێت، لە دە مەسەلەدا ڕەتیدەكاتەوە و بەهەمان شێوە دەیان مەسەلەی تریش.
ئەوەش شێوازێكی كۆنە كە خاوەن پرسیار ئەگەر فێڵباز و زۆرزان بێت دەتوانێت موفتی و دادوەر بخەڵەتێنیت یان تووشی هەڵەیان بكات لە حوكمداندا، بەڵكو تەنانەت پێغەمبەر 4h5 دەیفەرموو: (إنما أنا بشر وإنكم تختصمون إلي ولعل بعضكم أن يكون ألحن بحجته من بعض، وأقضي له على نحو ما أسمع ، فمن قضيت له من حق أخيه شيئا فلا يأخذ فإنما أقطع له قطعة من النار ) [1]0واتە: منیش مرۆڤێكم لەوانەیە كەسێك لە ئێوە قسەزان بێت و بەشێوەیەكی ناڕاست ڕوداوەكەم بۆ بگێڕێتەوەو منیش بە پێی ئەوەی كە دەیبیسم مافی پێ بدەم، بۆیە ئەگەر لەسەر ئەو قسەیەی خۆتان مافی براكەتانم پێدان وەریمەگرن، چونكە وەكو ئەوەیە پارچەیەك لە ئاگری بۆ ببڕمەوە و پێی بدەم!
4- لە ڕاستیدا هەموو بەڵگەكان دەڵێن ئەوان ئاگایان لە هەموو ئەوە نەبووەو لە كەسێكی ڕەوانە كراوی فێڵبازەوە وەكو تەڵە پرسیارێكی فێڵاویان لێ كراوە و ئەوانیش بوونە بە تەڵەكەوە و وەڵامی پرسیارێكی وا گەورەو گرنگیان بە شێوەیەكی مجمل و سەرپێیی داوەتەوە و ئەوەش بووەتە بیانوویەك بە دەستی كەسانێكەوە كە تەنها ئیشیان بەو فەتوایە هەیە (لحاجة في أنفسهم) خەڵكی عەوامیش بەوە هەڵخەڵەتاون و تێكەوتوون و كراون بە سووتەمەنی ئاگرێكی سوتێنەر و بێ بەزەیی، و فەتواكەیان كراوەتە هۆكار و بیانووی ئەو كارەساتەی كە بەسەر خەڵكیدا هێنراوە لەبەر بەرژەوەندی مادی و حیزبی خۆیان.
5- بەڵام لە گریمانەیەكدا ئەگەر ئەوانەشیان زانیبێت و دواجار ئەو فەتوایەیان هەردابێت بەهەر بیانوو و فشار و تێڕوانێكەوە بێت، ئەوا دەڵێین: زانای زۆر لەوان گەورەتر هەڵەی وایان كردووە فێرخوازێكی سەرەتایی زانست لێی تێپەڕ نابێت و ئەوە حاڵەتێكی سەیرو سەمەرە نییە! هەڵەی ابن باز و ابن عثیمین زۆر ڕوون و ئاشكرایە لەو فەتوایەدا و موخالیفە بۆ بنەما گشتییەكانی عەقیدەو بیروباوەڕی ئیسلامی ئەگەر مەبەستیان بەشداری ئەم جۆرە هەڵبژاردنانەی ئێستا بووبێت، بەڵام من وەكو خۆم زۆر بە دووری دەگرم ئەوان لەم هەموو كارەساتە ئاگادار بووبن و فەتواشیان دابێت كە درووستە بەشداری بكرێت!
چونكە هەموو قسەو وانە و كتێب و بەرنامە و فەتواكانی تریان بەڵگەن لەسەر پێچەوانەكەی و ئەوان بۆچوونیان هەرگیز وانەبووە پێشتر و دوای ئەو فەتوایەشیان، بەڵام پێم وایە سیاسەت و سیاسەتمەداران ڕۆڵیان بووە لە بێدەنگ بوون و پاشگەز نەبوونەوەیان.
6- ئەوە مەنهەجی ئەهلی بیدەع و گومڕاكانە كە بەدوای زەللـەو هەڵە و قسەی موجمەل و ناڕوونی زانایاندا دەگەڕێن و وەكو هەلێك دەیقۆزنەوە و بەكاریدەهێنن، وەكو ئەمانەی لای خۆمان ،كە لە هیچ شتێكی عەقیدەو مەنهەج و شوێنكەوتنی ئەهلی سوننەتدا شوێنی ئەو زانایانە ناكەون، بەڵكو ناوو ناتۆرەشیان لێ دەنێن و هەندێ جار گاڵتە بەعەقڵیشیان دەكەن لە شتی تردا، بەڵام لەم مەسەلەدا سەر زمان و بن زمانیان لە جیاتی ئەوەی بەڵگەی ئایەت و فەرموودە بۆ كارەكانیان بهێننەوە – كە مەحاڵە بتوانن – دەچن خۆیان بە فەتوایەكی خێرای سەرپێی ئەوانەوە هەڵواسیوە و وادەزانن لەو لادانەگەورەی كە لە مەنهەجی قورئان و سوننەت و ڕێبازی ئەهلی سوننەت تووشی بوونە ئەوە فریایان دەكەوێت!
7- حەقیقەتێكی حاشا هەڵنەگرە و هیچ كەسێك كەمترین زانستی شەرعی هەبێت ناتوانێت نكۆڵی لێ بكات ئەویش ئەوەیە: قسەی زانایان خۆی بۆ خۆی بەڵگە نییە بەڵكو پێویستە بەڵگەی لە كیتاب و سونەت بۆ بهێنرێتەوە ئەوجا وەردەگیرێت، ابن تيمية (رحمه الله) فەرموویەتی: (وَلَيْسَ لِأَحَدِ أَنْ يَحْتَجَّ بِقَوْلِ أَحَدٍ فِي مَسَائِلِ النِّزَاعِ وَإِنَّمَا الْحُجَّةُ النَّصُّ وَالْإِجْمَاعُ، وَدَلِيلٌ مُسْتَنْبَطٌ مِنْ ذَلِكَ تُقَرَّرُ مُقَدِّمَاتُهُ بِالْأَدِلَّةِ الشَّرْعِيَّةِ لَا بِأَقْوَالِ بَعْضِ الْعُلَمَاءِ؛ فَإِنَّ أَقْوَالَ الْعُلَمَاءِ يُحْتَجُّ لَهَا بِالْأَدِلَّةِ الشَّرْعِيَّةِ لَا يُحْتَجُّ بِهَا عَلَى الْأَدِلَّةِ الشَّرْعِيَّةِ)[2]. واتە: لەو مەسەلانەی كە ناكۆكی لێ دەكەوێتەوە، كەس بۆی نییە قسەی كەسێك بكاتە بەڵگە، بەڵكو بەڵگە تەنها لە دەقی قورئان و سوننەت و یەكدەنگی ئوممەتدایە، یان بەڵگەیەكی هەڵێنجراو كە پێشەكی و سەرەتاكانی بە بەڵگەی شەرعی نەك بە وتەی هەندی لە زانایان بڕیاری لەسەر بدرێت، چونكە قسەی زانایان پێویستیان بەبەڵگەی شەرعییە و نابنە بەڵگە بەسەر بەڵگە شەرعییەكانەوە.
جا ئەگەر وەكو ئەم حاڵەتەی لێرە باسی دەكەین ابن باز و ابن عثیمین نەبێت، مالك و شافیعی و ابن تیمیة وابن القیم یش بێت، یان هەر زانایەكی گەورەی تر ، قسەكەیان وەرناگیرێت و ڕەتدەكرێتەوە، چونكە فەتوای ڕێگەدان بە بەشداری كردن لە هەڵبژاردن، هیچ جیاوازی نییە لە گەڵ فەتوای هەڵوەشاندنەوەی حوكمەكانی كیتاب و سونەت و ڕێگەدان بە حوكمكردن بە غەیری كیتاب و سوننەت و هاوبەشدانان بۆ الله لە حوكمەكانیدا!
8- پرسیار لە شێخ (مقبل بن هادي الوادعي) كرا بەڕەحمەت بێت، كە شێخ هیچ پلەوپایەیەكی فەرمی نەبوو و لە ژێر فشاری كەسدا نەبوو تەنها بە بەڵگەی كیتاب و سونەت قسەی دەكرد و فەتوای دەدا، پێیان وت: حیزبە ئیسلامییەكان فەتواكانی ئەو زانایانە بڵاو دەكەنەوە سەبارەت بە ڕیگەدان بە بەشداری كردن لە هەڵبژاردن و دەنگدان، ئێوە چی دەڵێن؟ شێخ مقبل بە ڕەحمەت بێت فەرمووی: (أقول: هذا باطل ، فتوى الشيخ ابن باز باطلة ، وفتوى الشيخ ابن عثيمين باطلة، وفتوى الشيخ الألباني بالترخيص للجزائريين في دخول الانتخابات باطلة، فإن الله لم يقل : الانتخابات حرام إلا لكم يا أيها الجزائريون لشيخ ابن باز والشيخ ابن عثيمين والشيخ الألباني علماء أجلاء ، والعالم إذا أخطأ خطأ واحداً وله فضائل كثيرة فأهل العلم يقولون : ينبغي أن يغمر ذلك الخطأ في فضائله ، فهذا قول أهل العلم من زمن قديم). واتە: من دەڵێم: ئەوە قسەیەكی باتڵ و پووچەڵە! فەتواكەی ابن باز باتڵەو حەقی نەپێكاوە، فەتواكەی ابن عثیمین باتڵە و حەقی نەپێكاوە، فەتواكەی ئەلبانی كە ڕێگەی بە جەزائیرییەكاندا بەشداری هەڵبژاردنەكان بكەن باتڵەو حەقی نەپێكاوە، چونكە الله نەیفەرمووە هەڵبژاردن حەرامە تەنها بۆ ئێوە نەبێت ئەی جەزائیرییەكان! هەروەها دەڵێت ئەو زانایانە هەڵەیان كردووە و هەڵەكانیان لەبەر باشییەكانیان چاوپۆشی لی دەكرێت. بەڵام گومڕاكان كە چاك دەزانن و دڵنیان ئەو زانایانە نە مەبەستیان ئەوە بووە و نە ئەگەریش مەبەستیان ئەوە بووبێت پێكاویانە، كورد واتەنی وەكو كەسێكن لافاو ڕایماڵیبن و بەدوای چیلكەیەكدا بگەڕێت دەستی پێوە بگرێت، ئەگەریش سوور بزانن ئەو گژو گیا و چیلكەیە فریایای ناكەوێت، چونكە خۆیان خۆیان باش دەناسن كە لە ڕێبازی قورئان و سونەت لایانداوە و ئینحیرافیان كردووە، چاك دەزانن حەقیان ون كردووە و لەسەر ڕێگای باتڵن، تەنها گرەویان بە هەر حاڵێك بووە لەسەر هێشتنەوەی ئەندامان و دەستەبەر كردنی بڕێك دەنگدەرە بەو فەتوا باتڵانە.
9- دوای ئەوە شێخ مقبل كە زانا و فەرموودەناسێكی گەورەیە و هیچ بەرژەوەندییەكی لای كەس نەبوو لە ژیانیدا، بۆیە هەمیشە قسەی حەقی دەكرد و گوێی بەلۆمەی كەس نەدەدا، لە وتەیەكیدا دەری دەخات ابن باز خراپ حالی كراوە و ئەو بە باشی لە مەسەلەی هەڵبژاردن تێنەگەیشتووە بۆیە فەتوای ڕێگەدانی دەركردووە، دەڵێت: (وأنا متأكد أنهم أرسلوا إلى الشيخ ابن باز واحد لحيته إلى سرته وهو في ظاهره أنه سني ويقولون : يا شيخ كيف نترك المجال للشيوعيين ، والشيوعيون سيمنعونا من الدعوة ؟ – كما كانوا يأتون إلي – ثم يصدقهم الشيخ ، وإلا فهذه فتوى باطلة . فلا ينبغي أن نقلد فلا نقبل من الشيخ ابن باز ولا من الشيخ ابن عثيمين ولا من الشيخ الألباني أمراً إلا من كتاب الله ، ومن سنة رسول الله 4h5 والله المستعان) واتە: من دڵنیام ئەوان كەسێكیان بۆ لای شیخ ناردووە بەرواڵەت ڕیش درێژ و ئەهلی سوننەت، پێی وتووە یا شیخ چۆن بوار بۆ ماركسییەكان بكەینەوە و دواتر ڕێگەمان لێدەگرن لە بانگەوازكردن و شیخیش باوەڕی پێكردوون…نابێت هیچ قسەیەك نە لە ابن باز و نە لە ابن عثیمین و ئەلبانی قبوڵ بكەین بەبێ بەڵگەی كیتاب و سونەت.
10- هەر زانایەك ئەگەر فەتوای داوە بەشداریكردن لە هەڵبژاردن ڕێگەپێدراوە لە شەرعدا، پێویستە پرسیارەكەی بە شیكراوەیی و بە شێوەیەكی تر لێ بكرێتەوە بۆ ئەوەی دڵنیابین ئایا ئەو موفتییە لە ترسناكی ئەو بابەتە تێگەیشتووە كە قسەی تێدا كردووە یان نا، بۆیە پێویستە لێی بپرسین:
- ئایا تۆ زانیوتە كە دیموكراسی كە بەواتای حوكمی گەل دێت و بریتییە لە بڕبڕەی پشتی هەڵبژاردن، بنەما و كۆڵەكەی هەڵبژاردنە؟
- ئایا درووستە دەنگ بۆ بەرپاكردن و پەیڕەوی كردن لە دیموكراسی بدەیت لە كاتێكدا دیموكراسی بەتەواوی لەگەڵ ئیسلامدا وەكو عەقیدەو شەریعە دژوارە؟
- ئایا تۆ دەزانیت لە پەرلەماندا هیچ پیرۆزییەك یان پارێزراوی و حەسانەتێك بۆ هیچ حوكمێكی ئیسلام نامینیت و هەمووی دەخرێتەوە دەنگدانەوە، زۆرینە لەسەر چی ڕێككەوتن هەر ئەوەیە، بە بێ گوێدان بەوەی لە قورئان و لە سوننەتدا حوكمیان چییە و چۆنە؟
- ئایا تۆ دەزانیت ئەندامانی پەرلەمانەكان، هەموویان ڕۆڵی ئەرباب دەبینن و تەشریع دەكەن و ئیسلامیش لە هەندێ مەسەلەدا بەلایانەوە سەرچاوەی یاسا دانان نییە؟
- ئایا تۆ دەزانیت ئەو كەسەی كە بەفەتوای تۆ دەچێت بۆ پەرلەمان، یەكەم كاری سوێند خواردنە لەسەر جێبەجێكردنی دەستور، كە دەستور لە زۆررێك لە مادەكانیدا لە گەڵ ئیسلامدا ناكۆكە؟
- ئایا درووستە بە قورئان سوێند لەسەر دژایەتی حوكمەكانی قورئان بخورێت؟ ! ئایا تۆ دەزانیت لە پەرلەمان حوكم بۆ گەل و بۆ زۆرینەیە نەك بۆ الله پاشان پێغەمبەرەكەی 4h5؟
- ئایا دەزانیت (إن الحكم إلا لله) لەوێ دەگۆڕێت بە (إن الحكم إلا للشعب)؟
- ئایا تۆ دەزانیت ئەو كەسەی كە بەفەتوای تۆ دەڕواتە ئەو پەرلەمانە، نوێنەری خەڵكە و وەكیل و بریكاریانە بۆ ئەو هەموو لادان و دژایەتیكردنە بۆ دینی ئیسلام و ئەوان بە فەتوای تۆ گومرا دەبن و ئەو كارە دەكەن، ئایا دەزانیت ئەو كەسە تاوانی هەموویان هەڵدەگریت؟
- ئایا تۆ دەزانیت ئەمانەی كە بۆ پەرلەمان دەڕۆن بەناو ئیسلامەوە، وابەستەبوونیان بە ئیسلامەوە لاوازەو لە ئەلفوبێی عەقیدە تێنەگەیشتوون و ناشیانەویت تێبگەن و گاڵتەشیان بەوانە دێت زۆر باسی عەقیدە دەكەن؟ ئایا دەزانیت هەندێ لەوانە بە زمانی خۆیان دەڵێن ئێمە بەرنامەی ئەوەمان نییە ئیسلام فەرمانڕەوا بێت و داوای جێبەجێكردنی شەریعەت ناكەین! بەڵكو لەوەش زیاتر ئەوان لە زۆر بیروباوەڕەكانیاندا لە گەڵ عەلمانیەكاندا كێبڕكێ دەكەن و لە سیاسەت و لە ڕاگەیاندن و لە ڕواڵەتیش بە زۆر لە عەلمانییەكان جیادەكرێنەوە؟
- ئایا دەزانیت ئەو ئەندام پەرلەمانە بەناو ئیسلامیانە جەهل و ڕازیكردنیان بۆ عەلمانیەت و عەلمانییەكان سنووری نییە، تێیاندایە بەبێ هیچ شەرمكردنێك لەسەر شاشەكانەوە
پێناوی ڕیكلامكردن بۆ خۆیان و ڕازی كردنی ناحەزانی دینەكەیان دەڵێن: نوێژ كردن لە ئیسلامدا جۆریكە لە سەماكردن ! پێشنویژیش مایسترۆیە و نوێژخوێنان ئاراستە دەكات بۆ سەماكردن و خۆ بادان و خۆ جوڵاندنەوە؟ كە ئەم قسەیە سەرەڕای ئەوەی خاوەنەكەی دڵۆپەیەك شەرمی نەماوە لە ترسی ئەوەی ناوی دەرنەچێت، هاوكات ڕەنگە بەراورد بە زۆر قسەی تریان زۆر ئاسان و ئاسایی بێت! چونكە ئەوان ئەسڵەن لە عەقیدەو بیروباوەڕ و مەنهەجی ئەهلی سوننەت تێنەگەیشتوون، هەركام لەوانە چەندین رەخنەی ناراستەوخۆی لە ئیسلام هەیە بەتایبەتی ڕەخنە لە فەرموودەكان و لە تێگەیشتنی زانایانی سەلەف!
زۆر لە شەرعی ئیسلام بێ ئاگان و بۆ ئیش و كار و بەرژەوەندی تایبەتی خۆیان و لایەنەكانیان لەوێن.
ئەی ئەو كەسەی كە فەتوای بەشداری كردنت لە هەڵبژاردندا داوە هەركێ هەیت! ئەگەر هەموو ئەمانە دەزانیت و هەر دەڵێیت بەڵێ بەشداری كردن لە هەڵبژاردندا درووستە و جائیزە دەنگیان پێ بدەن و، ئەندام بوون لەو پەرلەمانە كێشەیەكی شەرعی تێدا نییە!
ئەوا خۆت پێناسەی خۆتت كردووە و وەڵامێكی ڕوونت بە هەموو ئەو كەسانەش داوە كە تۆ بە زانا دەزانن وئیتر كەیفی خۆیانە بەو حاڵەشەوە ئەگەر هەر بە قسەت بكەن و هێشتا هەر بە زانات بزانن!
بۆ ئەوانەش كە تۆ بە گومڕاو گومڕاكەر دەزانن لەبەر ئەو فەتوایەت، بە هەمان شێوە وەڵامێكی ڕوون و پێناسەیەكی ڕاستی خۆتت بۆ كردوون و هەردوولایانت ئاسوودە و (علی بینة) كردووە دەربارەی خۆت و جوان لێت تێگەیشتوون، ئەگەریش لەوانەی كە باسكرا و دەیان كارەساتی تر بێ ئاگایت و فەتواكەت بەبێ زانست و ئاگاداربوون لەو كارەساتانە داوە، ئەوا بلێ پەروەردگارم هەڵە بووم و تەوبە لەو تاوانە گەورەیە دەكەم و شەرمەزارتم كە بە نەزانی خۆم بووم بە هۆكاری گومڕاكردنی خەلك و سەرم لێ شێواند.
بۆیە ئەی موسوڵمان تەنها لەبەر ڕەزامەندی الله پێت دەڵێم: لە خشتە نەچیت!
چونكە بەهەموو شێوازێك هەوڵت لەگەڵ دەدرێت تۆیش وەكو خۆیان لەخشتەبەرن و بتكەنە پەیژەی سەركەوتن بۆ ئامانجەكانیان! دڵنیابە دوای ئەوەش كە دینەكەت لەكەدار دەكەن و ئەوەی دەیانەوێت پێت دەكەن، ئینجا بە عەقلیشت پێ دەكەنن ودەڵێن: یاخوا ئەمانە هەروا بەدینەكەیان نەفام بن دوور بن لە زانستی شەرعی، بۆ ئەوەی لە هەموو هەڵبژاردنێكدا بەو شێوە بیانكەین بە پەیژەی سەركەوتنی خۆمان.
[1] – البخاري (٦٥٦٦).
[2] – مجموع الفتاوى (26/ 202)
